amoxtli sē

īpan īn āmantl nipēwas nimēchīxmachīltīs kēnōn kwahli tomaxtīskeh totlatōl, sē momōstla panowa niman nochipa tokamawīwisohtokeh kēnōn tikēhchīwaskeh totlatōl, sekimeh san kwālitowah, kāyuweh, tōmeh i tiweltokeh titlahtlatowah, xmoneki sē kixchānoh ma wāhlatiw nikān niman ma tēchkahkayāwaki kēnōn tomaxtīskeh, noso kēnōn titlakwilōskeh, xkā tēh ikwāk pēwah tēchnohnōtsah i yō kitowah lāmpa weltokeh kēnōn titlatlahtowah, sā xok kimatih kēnōn kinānkilīskeh yōn xchāneh, niman xyō ītlatōl, niman nochimeh nokamapalēwiah yā kitowah, yō xnikān tēchāhnawatitiās kēnōn titlakwilōskeh niman kēnōn tonohnōtsaskeh, kwākōn xkwelitah niman xkiseliah sē yō yā milāk īpan nokāwa īn tlatōhli yā nomaxtia āman, kipihpīnāwtiah, yōn hkiīn kitsakwiliah tlatōhli niman xkasikāmatisnekih kēnōn kwaltsīn tasikāmatiskeh nēsi yā milāk yōkasikeh īntlamachilis kēn koyōmeh, kētla yōnokoyōkwepkeh, xkā tēh tlā ok tāman kasikāmatisiah kēnōn yā milāk iktok totlamachilis nēsi nō sehneka yeskia, āman, kas i kwahli tēh, keāman san xkonitakān, nikān nēsi nīn xwikāwi yā i nimēchononōstok ōn, māsi hkōn xtlah nihkwi niman nīn xtlah nihtlatlanilia kastillatlatōhli, nihnemilia, hkiōn kēn nimēchnohnōstok kwahli ninkasikāmastiwih, sayā tlāsaman sekimeh kitōskeh, ah, yoún nō sē tlamantli weli yōyā hkōn tēchnohnōstok, māsi ihkoōn nawa nihmastok yā kēmah māsi san tlakotipantsīn ninēchkahtokeh, kwākōn nimechtlahtōltīsneki, tliāōn kipia yā tihkwiskeh koyōtlatōhli, kwā totlatōl nōyeh yōmokwep, simi xtahsikāmatih nīn āchitsīn kēnōn tonohnōtsah, noso, tliā ītech towīkaskeh ōn kastillatlatōhli kēnōn iktok ītlamanyo ikwāk tlakwilōlo, kā tōmeh xwel sapa sehnekatsīn tihnemilīskeh kēnōn kwahli tiyektlālīskeh īn totlatōl noso, ninkitōskeh yā nihkwi īn nēskāyōtl āman yō wālēwa kāmpa istākeh tlākameh, niman tēh yō īn nēskāyōtl i ōnkatka īpan 1645 īpan ītlakwilōl Jesuita Horacio Carochi.