Oksehpa yōniwāhlah

niknemiliāya tlā xok nitlahkwilōs, san ika kemantika xlāmpa nikahxilia, māski āman xlāk nikahxilīs, nikyehyekōs nitlakwilōs māski san āchihtsīn,

ōnkah miak tlīn weliskia niktlālīskia, āman san nikpēwaltia ika kēn tēchitah nānika wehka, āxtōpa, kinemiliah tilatinos noso tiānāwakchānehkeh milāk xtikwahkwaltih, niman nīn xtitlamachilisehkeh, āman tlā tiawih san tlāihtik, nō san tiānāwakchānekeh (xtehtēmōkān tlīn kihtōsneki ānāwak kāmpa google) tēchpīnāhtiah, ika kinemiliah tehwameh lāk nōhki xkwahli kēn titlakwah noso kēn tichāntih, māski ihkoón nehwa xlāk nēchahmana, pampa kwāk titlahtlatowah niman nēstok ākin xkīxmati tomexīhco, nimān keāman nankimastokeh méxico tiindígenas, nōhki xipan tēchitah Kixchiānomeh, noso koyōmeh kēn sekimeh kimīhliah, āman ihkoón tokwahkwalānitinemih, māski san tahwameh kamantika tonexīkōlitah, niman tlā ika milāk tikitahsiah san sēwēi tlīn tēchahmana, ika milāk tikitahsiah kipia ika topalēwīskiah, pampa miak ahmantli īpan nochi ihwīn tlāltekpaktli, pampa niknemilia kwāk ītitlantoskeh nochime titlāltipanchānehkeh xok yahwa ōn tēchamantoskia kēn nemi sē noso kēn nomih oksekimeh, kwākōn, kētla nochi san tlayowalotikah nexīkōlistli, yahwa tēchixtēntsahtsakwa, tlā milāk sē kahsikāmatisneki oksekimeh, san welis kiminkakis, niman ompa kitas, ika tinochimeh, tiktehtēmowah nochi san sē yehwa, tēchtlamachilispolowa tomīn, niman nexīkōlistli.

niknemilia tinochimeh tikīxmastokeh nochi tlīn ika milāk, san pampa kamantika xtikneki tikintēnkakiskeh oksekimeh, san pampa xtikwelkakih tlīn kihtowa, niknemilia, māski ta ākin xkwahli tlahtlatowa noso kēn tlanemilia, kimastikah, tlieka ihkōn tlahtatowa niman kēmah melāwak tlīn kihtowa.

pampa tinochimeh, tikpiah māski san āchihtsīn tlīn ika milāk